భూపాలపల్లి సింగరేణి సి.ఇ.ఆర్. క్లబ్లో కొత్త వివాదం…!
ఎన్నికలా..? సంప్రదాయమా..? గుర్తింపు సంఘం హక్కుపై ఏఐటీయూసీ అభ్యంతరం.
రూ.26 లక్షలకు పైగా నిధుల లెక్కలపై ప్రశ్నలు.. జూలై 12 ఎన్నికలను బహిష్కరణకు నిర్ణయం ?
(ప్రజాలక్ష్యం ప్రతినిధి)
జయశంకర్-భూపాలపల్లి, జూలై 10:భూపాలపల్లి సింగరేణి సి.ఇ.ఆర్. క్లబ్ నిర్వహణ అంశం ఇప్పుడు కార్మిక సంఘాల మధ్య కొత్త వివాదానికి దారితీసింది. క్లబ్కు ఎన్నికలు నిర్వహించాలని యాజమాన్యం తీసుకున్న నిర్ణయాన్ని గుర్తింపు కార్మిక సంఘం ఏఐటీయూసీ తీవ్రంగా వ్యతిరేకిస్తోంది. గత 37 ఏళ్లుగా కొనసాగుతున్న సంప్రదాయాన్ని పక్కనపెట్టి ఎన్నికలు నిర్వహించడం వెనుక ఉద్దేశం ఏమిటని ప్రశ్నిస్తోంది. మరోవైపు, క్లబ్ నిధుల వినియోగం, లెక్కల నిర్వహణపై కూడా ఏఐటీయూసీ పలు ఆరోపణలు చేస్తూ సమగ్ర విచారణ కోరుతోంది.
37 ఏళ్ల సంప్రదాయం ఇదే…
1989లో భూపాలపల్లి ఏరియా ప్రారంభమైనప్పటి నుంచి సి.ఆర్. క్లబ్కు ప్రత్యేకంగా ఎన్నికలు నిర్వహించిన దాఖలాలు లేవని ఏఐటీయూసీ పేర్కొంటోంది. ఏ సమయంలో ఏ కార్మిక సంఘం గుర్తింపు సంఘంగా ఉంటే, అదే సంఘం ప్రతినిధి క్లబ్ కార్యదర్శిగా వ్యవహరించడం ఆనవాయితీగా కొనసాగిందని తెలిపింది. గతంలో టిబిజీకేఎస్, అనంతరం ఐఎన్టీయూసీ గుర్తింపు సంఘాలుగా ఉన్నప్పుడు కూడా ఇదే విధానం అమలైందని గుర్తు చేసింది.
ఇప్పుడు ఎందుకు ఎన్నికలు?
ప్రస్తుతం ఏఐటీయూసీ గుర్తింపు సంఘంగా ఉన్న నేపథ్యంలో క్లబ్ నిర్వహణ బాధ్యతలు తమకు అప్పగించాలని యాజమాన్యాన్ని కోరామని, అయితే ఆ బాధ్యతలు అప్పగించకుండా జూలై 12న ఎన్నికలు నిర్వహించాలని నిర్ణయించడం సంప్రదాయానికి విరుద్ధమని ఏఐటీయూసీ ఆరోపిస్తోంది. ఇది గుర్తింపు సంఘం హక్కులను కాలరాసే చర్యగా అభివర్ణించింది.
రూ.26 లక్షల నిధులపై లెక్కలు చెప్పాలంటున్న ఏఐటీయూసీ:
సి.ఇ.ఆర్. క్లబ్ ఆర్థిక వ్యవహారాలపైనా ఏఐటీయూసీ ప్రశ్నలు లేవనెత్తింది. ప్రతి నెలా సభ్యత్వ రుసుముల రూపంలో సుమారు రూ.20 వేల వరకు వసూలవుతుండగా, సింగరేణి యాజమాన్యం కూడా గ్రాంట్ అందజేస్తోందని పేర్కొంది. నెలవారీ ఖర్చులు తక్కువగానే ఉన్నప్పటికీ ప్రస్తుతం క్లబ్ ఖాతాలో సుమారు రూ.26.25 లక్షలు ఉన్నాయని తెలిపింది. 2015లో క్లబ్ ఖాతాలో రూ.5.40 లక్షలు ఉండగా, ఆ తర్వాత వచ్చిన ఆదాయం, ఖర్చులపై సభ్యులకు పూర్తి వివరాలు వెల్లడించలేదని ఆరోపించింది.
ఆర్థిక లావాదేవీలపై ఆరోపణలు:
గతంలో క్లబ్ కార్యదర్శులుగా పనిచేసిన కొందరు వ్యక్తులు తీసుకున్న నగదు ఖర్చులకు సంబంధించి పూర్తి లెక్కలు లేవని ఏఐటీయూసీ ఆరోపించింది. ఫ్రిజ్ మరమ్మతుల పేరుతో ఖర్చు చేసిన నిధులకు సంబంధించిన రసీదులు లేవని, క్లబ్ కోసం కొనుగోలు చేసినట్లు చూపిన 200 కుర్చీలు ప్రస్తుతం అందుబాటులో లేవని పేర్కొంది. ఈ అంశాలపై పూర్తి స్థాయి ఆడిట్ నిర్వహించాలని డిమాండ్ చేసింది.
క్రీడాకారులతో కమిటీ ఏర్పాటు ప్రతిపాదన:
క్లబ్ను రాజకీయాలకు అతీతంగా నిర్వహించేందుకు క్రీడాకారులతో కూడిన కమిటీ ఏర్పాటు చేయడానికి తాము సిద్ధంగా ఉన్నామని ఏఐటీయూసీ తెలిపింది. అయితే నిర్వహణ బాధ్యత మాత్రం గుర్తింపు సంఘం ఆధ్వర్యంలోనే ఉండాలని స్పష్టం చేసింది.
ఎన్నికలను బహిష్కరిస్తాం:
జూలై 12న నిర్వహించనున్న ఎన్నికల్లో ఏఐటీయూసీ పాల్గొనబోదని ప్రకటించింది. ఎన్నికలు నిర్వహించకుండా గత సంప్రదాయం ప్రకారం క్లబ్ బాధ్యతలను గుర్తింపు సంఘానికే అప్పగించాలని యాజమాన్యాన్ని మరోసారి కోరింది.
యాజమాన్యం స్పందనపై ఆసక్తి:
సి.ఇ.ఆర్. క్లబ్ ఎన్నికల అంశం ఇప్పుడు భూపాలపల్లి ఏరియాలో చర్చనీయాంశంగా మారింది. ఒకవైపు సంప్రదాయాన్ని కొనసాగించాలని గుర్తింపు సంఘం పట్టుబడుతుండగా, మరోవైపు ఎన్నికల ద్వారా పాలకవర్గాన్ని ఎన్నుకోవాలనే యాజమాన్యం నిర్ణయం కొనసాగుతోంది. ఈ నేపథ్యంలో జూలై 12న ప్రతిపాదిత ఎన్నికలు జరుగుతాయా? లేక చర్చల ద్వారా పరిష్కారం లభిస్తుందా? అనే అంశంపై సింగరేణి కార్మికులు, క్రీడాకారులు ఆసక్తిగా ఎదురుచూస్తున్నారు.
