సింగరేణిలో అధికారుల అసంతృప్తి జ్వాలలు-హక్కుల కోసం ఉద్యమబాటలో 2,200 మంది అధికారులు.

సింగరేణిలో అధికారుల అసంతృప్తి జ్వాలలు.
హక్కుల కోసం ఉద్యమబాటలో 2,200 మంది అధికారులు.                                       స్పందించని యాజమాన్యంపై పెరుగుతున్న ఆవేదన.
నేడు గోదావరిఖనిలో భారీ ర్యాలీ.                (ప్రజాలక్ష్యం ప్రత్యేక ప్రతినిధి)                    హైదరాబాద్, జూన్ 16:తెలంగాణ పారిశ్రామిక ప్రగతికి ప్రతీకగా నిలిచిన సింగరేణి సంస్థలో ప్రస్తుతం ఒక నిశ్శబ్ద అసంతృప్తి అలుముకుంది. బొగ్గు ఉత్పత్తి లక్ష్యాలను అధిగమిస్తూ, సంస్థ లాభదాయకతకు కృషి చేస్తున్న అధికారులు తమ సమస్యలు సంవత్సరాలుగా పరిష్కారం కాకపోవడంతో ఉద్యమబాట పట్టడం సంస్థ వర్గాల్లో చర్చనీయాంశంగా మారింది. సింగరేణి సంస్థలో దాదాపు 2,200 మంది అధికారులు వివిధ విభాగాల్లో విధులు నిర్వహిస్తున్నారు. భూగర్భ గనుల నిర్వహణ, ఓపెన్‌కాస్ట్ ప్రాజెక్టుల పర్యవేక్షణ, భద్రతా చర్యల అమలు, యంత్రాల నిర్వహణ, ఉత్పత్తి ప్రణాళికలు, ఆర్థిక నిర్వహణ, పర్యావరణ పరిరక్షణ వంటి కీలక బాధ్యతలను వారు నిర్వర్తిస్తున్నారు. సంస్థ విజయాలకు కార్మికుల శ్రమ ఎంత ముఖ్యమో, ఆ శ్రమను సమర్థవంతంగా వినియోగించే అధికారుల పాత్ర కూడా అంతే కీలకం. అయితే గత కొన్నేళ్లుగా తమ న్యాయమైన డిమాండ్లు పరిష్కారం కాకపోవడంతో అధికారులు తీవ్ర అసంతృప్తికి గురవుతున్నారు. సమస్యల పరిష్కారం కోసం యాజమాన్యానికి, ప్రభుత్వానికి పలు దఫాలు విజ్ఞప్తులు చేసినప్పటికీ ఫలితం లేకపోవడంతో ఇప్పుడు ఆందోళన కార్యక్రమాలకు శ్రీకారం చుట్టారు.

కోల్ ఇండియా అధికారులకు ఒక న్యాయం… సింగరేణి అధికారులకు మరో న్యాయమా?

అధికారుల ప్రధాన డిమాండ్లలో అత్యంత కీలకమైనది పే అప్‌గ్రేడేషన్. దేశవ్యాప్తంగా ప్రభుత్వ రంగ బొగ్గు సంస్థ అయిన కోల్ ఇండియా లిమిటెడ్ (సీఐఎల్)లో అధికారులకు పే అప్‌గ్రేడేషన్ అమలు చేసినప్పటికీ, అదే తరహా బాధ్యతలు నిర్వర్తిస్తున్న సింగరేణి అధికారులకు ఇప్పటివరకు అమలు కాలేదు. దీంతో ఒకే రంగంలో పనిచేస్తున్న అధికారుల మధ్య వేతన వ్యత్యాసాలు ఏర్పడ్డాయి. సింగరేణి అధికారులు తమ సేవలు, అర్హతలు, బాధ్యతలు ఏ మాత్రం తక్కువ కాకపోయినా సమాన ప్రయోజనాలు అందకపోవడాన్ని వివక్షగా భావిస్తున్నారు. వెంటనే పే అప్‌గ్రేడేషన్ అమలు చేయాలని వారు డిమాండ్ చేస్తున్నారు.

పీఆర్పీ బకాయిలపై పెరుగుతున్న అసహనం:

సింగరేణి అధికారులు ఎదుర్కొంటున్న మరో ప్రధాన సమస్య పర్ఫార్మెన్స్ రిలేటెడ్ పే (పి.ఆర్.పి.). సంస్థ పనితీరు, లాభాల ఆధారంగా అధికారులకు చెల్లించే ఈ ప్రోత్సాహక వేతనం 2022-23, 2023-24 సంవత్సరాలకు సంబంధించి ఇంకా చెల్లించలేదు. సంస్థ లాభాల్లో కీలక పాత్ర పోషించిన అధికారులకు చెల్లించాల్సిన ప్రోత్సాహకాలను ఆలస్యం చేయడం వారి మనోధైర్యాన్ని దెబ్బతీస్తోందని సంఘ నాయకులు పేర్కొంటున్నారు. ఇప్పటికే దేశంలోని అనేక ప్రభుత్వ రంగ సంస్థల్లో పీఆర్పీ చెల్లింపులు జరిగాయని, సింగరేణిలో మాత్రం జాప్యం కొనసాగుతోందని ఆవేదన వ్యక్తం చేస్తున్నారు.

ఖాళీల భర్తీ లేక పెరుగుతున్న పని భారం:

గత కొన్ని సంవత్సరాలుగా పదవీ విరమణలు, బదిలీలు, ఇతర కారణాలతో అధికారుల సంఖ్య గణనీయంగా తగ్గింది. అయితే ఆ మేరకు కొత్త నియామకాలు జరగలేదు. దీంతో ఉన్న అధికారులపై అదనపు పని భారం పడుతోంది. ఒక అధికారి నిర్వహించాల్సిన పనిని ఇద్దరు లేదా ముగ్గురు అధికారుల పనిగా నిర్వహించాల్సిన పరిస్థితులు ఏర్పడుతున్నాయని వారు చెబుతున్నారు. ఉత్పత్తి లక్ష్యాలు, భద్రతా బాధ్యతలు, పరిపాలనా పనులు పెరుగుతున్నా సిబ్బంది సంఖ్య తగ్గిపోవడం సంస్థ పనితీరుపైనా ప్రభావం చూపే ప్రమాదం ఉందని ఆందోళన వ్యక్తమవుతోంది.

నిలిచిపోయిన పదోన్నతులు:

అధికారుల అసంతృప్తికి మరో కారణం పదోన్నతుల వ్యవస్థలో జాప్యం. అర్హత ఉన్నప్పటికీ చాలా మంది అధికారులు సంవత్సరాల తరబడి పదోన్నతుల కోసం ఎదురుచూస్తున్నారు. కొన్ని విభాగాల్లో పదోన్నతుల విధానంపై స్పష్టత లేకపోవడం, మరికొన్ని విభాగాల్లో ఖాళీలు భర్తీ కాకపోవడం వల్ల కెరీర్ పురోగతి నిలిచిపోతోందని అధికారులు వాపోతున్నారు. సమర్థత, అనుభవం, సేవా కాలం ఆధారంగా సమయానుకూలంగా పదోన్నతులు ఇవ్వాలని వారు కోరుతున్నారు.

సంస్థ కోసం పగలు-రాత్రి కష్టపడుతున్న అధికారుల గోడు:

సింగరేణి గనుల్లో విధులు నిర్వర్తించడం సాధారణ ఉద్యోగం కాదు. భూగర్భ గనుల్లో ప్రమాదకర పరిస్థితులు, ఉత్పత్తి ఒత్తిడులు, భద్రతా బాధ్యతలు, సాంకేతిక సవాళ్ల మధ్య అధికారులు పనిచేస్తుంటారు. పండుగలు, సెలవులు, కుటుంబ కార్యక్రమాలు పక్కన పెట్టి విధులకు హాజరవుతున్న సందర్భాలు అనేకం. అలాంటి పరిస్థితుల్లో తమ సమస్యలు పరిష్కారం కాకపోవడం వల్ల అధికారులు తీవ్ర నిరాశకు గురవుతున్నారు. ఇది కేవలం ఆర్థిక ప్రయోజనాల కోసం చేసే పోరాటం కాదని, తమ సేవలకు తగిన గుర్తింపు, గౌరవం, న్యాయం కోరుతున్న ఉద్యమమని వారు చెబుతున్నారు.

గోదావరిఖని ర్యాలీతో ఉద్యమానికి శ్రీకారం:

అఖిల భారత బొగ్గు గనుల అధికారుల సంఘం (సిఎంఓఏఐ) ఆధ్వర్యంలో జూన్ 17న గోదావరిఖని ప్రాంతంలో భారీ ర్యాలీ నిర్వహించనున్నారు. సింగరేణి అర్జీవన్, అర్జీటూ, అర్జీత్రీ, ఏపిఏ, భూపాలపల్లి, శ్రీరాంపూర్, మందమర్రి, బెల్లంపల్లి, ఎస్.టి.పి.పి. ప్రాంతాలకు చెందిన అధికారులు ఇందులో పాల్గొననున్నారు. ఈ ర్యాలీ ద్వారా తమ ఐక్యతను చాటడంతో పాటు యాజమాన్యం, రాష్ట్ర ప్రభుత్వం దృష్టిని సమస్యలపై కేంద్రీకరించాలని అధికారులు భావిస్తున్నారు.

పరిష్కారమే మార్గం:

సింగరేణి సంస్థ అభివృద్ధిలో అధికారులు కీలక భాగస్వాములు. వారి సమస్యలను నిర్లక్ష్యం చేయడం కంటే చర్చల ద్వారా పరిష్కరించడం సంస్థ ప్రయోజనాలకే మంచిది. పే అప్‌గ్రేడేషన్, పీఆర్పీ, ఖాళీల భర్తీ, పదోన్నతుల వంటి అంశాలపై సత్వర నిర్ణయాలు తీసుకోవడం ద్వారా అధికారుల్లో విశ్వాసం పెంపొందించవచ్చు. సంస్థ విజయాలకు కృషి చేస్తున్న అధికారుల గళాన్ని వినడం, వారి న్యాయమైన డిమాండ్లపై సానుకూలంగా స్పందించడం యాజమాన్యం, ప్రభుత్వ బాధ్యత. లేకపోతే ప్రస్తుతం మొదలైన అసంతృప్తి రాబోయే రోజుల్లో మరింత పెద్ద ఉద్యమంగా మారే అవకాశాన్ని కొట్టిపారేయలేము.