కోల్ మైన్స్ పెన్షన్ స్కీమ్‌పై కీలక ప్రకటన.

కోల్ మైన్స్ పెన్షన్ స్కీమ్‌పై కీలక ప్రకటన.
కొత్త చట్టం తర్వాత సమగ్ర పునర్వ్యవస్థీకరణ.. పెన్షన్ ఫండ్‌పై ఉన్నతస్థాయి కమిటీ.
తక్కువ పెన్షన్‌దారులకు కనీసం రూ.1,000 పెన్షన్.. విరాళాల పెంపుతో నిధి బలోపేతం.
(ప్రజాలక్ష్యం ప్రత్యేక ప్రతినిధి)
హైదరాబాద్, ఆగస్టు 12: కోల్ మైన్స్ పెన్షన్ స్కీమ్ (CMPS)-1998లో సంస్కరణలు, పెన్షన్ ప్రయోజనాల బలోపేతానికి సంబంధించి కీలక అంశాలపై కోల్ మైన్స్ ప్రావిడెంట్ ఫండ్ ఆర్గనైజేషన్ (CMPFO) స్పష్టత ఇచ్చింది. కోల్ మైన్స్ ఎంప్లాయీస్ ప్రావిడెంట్ ఫండ్ (CMEPF) బిల్లు ప్రస్తుతం పార్లమెంటులో ప్రవేశపెట్టడానికి ముందు మంత్రిత్వ శాఖ, సంబంధిత అధికారుల పరిశీలనలో ఉందని వెల్లడించింది. కొత్త చట్టం అమల్లోకి వచ్చిన అనంతరం CMPSతో పాటు సంబంధిత పథకాలన్నింటినీ కొత్త చట్టబద్ధ నిబంధనలకు అనుగుణంగా సమగ్రంగా పునర్వ్యవస్థీకరించనున్నట్లు తెలిపింది. CPGRAMS పోర్టల్ ద్వారా శ్రీ పి.కె. సింగ్ రాఠోడ్ సమర్పించిన ఫిర్యాదు/అభ్యర్థనకు స్పందిస్తూ CMPFO అసిస్టెంట్ కమిషనర్ మధురేష్ కుమార్ సింగ్ ఈ వివరాలను వెల్లడించారు. ఆగస్టు 11న జారీ చేసిన సమాధానంలో పెన్షన్ ఫండ్ స్థిరత్వం, పెన్షన్ ప్రయోజనాల పెంపు, అదనపు నిధుల సమీకరణ తదితర అంశాలపై పాయింట్ల వారీగా వివరణ ఇచ్చారు.

పెన్షన్ ఫండ్‌పై ఉన్నతస్థాయి కమిటీ:

2024 ఫిబ్రవరి 22న న్యూఢిల్లీలో జరిగిన 180వ బోర్డ్ ఆఫ్ ట్రస్టీస్ సమావేశ నిర్ణయం మేరకు పెన్షన్ ఫండ్ దీర్ఘకాలిక స్థిరత్వాన్ని సమీక్షించి సంస్కరణలను సూచించేందుకు ఉన్నతస్థాయి కమిటీని ఏర్పాటు చేసినట్లు CMPFO తెలిపింది. బొగ్గు మంత్రిత్వ శాఖ అదనపు కార్యదర్శి అధ్యక్షతన ఏర్పాటైన ఈ కమిటీలో కోల్ ఇండియా లిమిటెడ్ (CIL), సింగరేణి కాలరీస్ కంపెనీ లిమిటెడ్ (SCCL) ఫైనాన్స్ డైరెక్టర్లు, EPFO ప్రతినిధి, ట్రేడ్ యూనియన్ ప్రతినిధులు, CMPFO కమిషనర్, యాక్చువరీ నిపుణుడు సభ్యులుగా ఉన్నారు.

తక్కువ పెన్షన్‌దారులకు కనీసం రూ.1,000:

CMPS-98 ఫండ్‌లో తీవ్ర ఆర్థిక లోటు సవాళ్లు ఉన్నప్పటికీ కనీసం 30 ఏళ్ల పెన్షన్ సేవ పూర్తి చేసి పదవీ విరమణ చేసినవారికి, వికలాంగ పెన్షనర్లకు, జీవిత భాగస్వామి పెన్షనర్లకు నెలకు కనీసం రూ.1,000 పెన్షన్ అమలు చేసినట్లు CMPFO పేర్కొంది. అయితే పెన్షన్ ప్రయోజనాల మరింత పెంపు ఫండ్ ఆర్థిక సామర్థ్యం, దీర్ఘకాలిక స్థిరత్వంపై ఆధారపడి ఉంటుందని స్పష్టం చేసింది.

పెన్షన్ ఫండ్‌కు అదనపు నిధులు:

ఫండ్ లోటును పూడ్చడంతో పాటు ఆర్థిక స్థిరత్వాన్ని పెంచేందుకు విరాళాల రేట్లను పెంచినట్లు తెలిపింది. CMPS-98 కింద ఉద్యోగి, యజమాని వాటాలను చెరో 7 శాతానికి పెంచినట్లు పేర్కొంది. అదనంగా కోల్ ఇండియా, దాని అనుబంధ సంస్థలు, సింగరేణి ద్వారా నాన్-కోకింగ్ బొగ్గుపై టన్నుకు రూ.20, కోకింగ్ బొగ్గుపై టన్నుకు రూ.10 చొప్పున అదనపు నిధులు సమకూరుతున్నాయని వివరించింది.

మూడేళ్లకోసారి ఫండ్ సమీక్ష:

CMPS-1998లోని పారా 22 ప్రకారం బోర్డు నియమించిన యాక్చువరీ ప్రతి మూడేళ్లకోసారి పెన్షన్ ఫండ్‌ను సమీక్షిస్తారని CMPFO తెలిపింది. ఫండ్ ఆర్థిక పరిస్థితి, స్థిరత్వాన్ని పరిగణనలోకి తీసుకున్న అనంతరమే పెన్షన్ ప్రయోజనాల పెంపుపై నిర్ణయం తీసుకునే అవకాశం ఉంటుందని స్పష్టం చేసింది. మొత్తంగా, CMEPF బిల్లు చట్టరూపం దాల్చిన అనంతరం CMPS-98 సహా సంబంధిత పథకాల పునర్వ్యవస్థీకరణ, పెన్షన్ ఫండ్ స్థిరత్వంపై ఉన్నతస్థాయి కమిటీ సమీక్ష, అదనపు నిధుల సమీకరణ వంటి చర్యల ద్వారా పెన్షన్ వ్యవస్థను బలోపేతం చేసే దిశగా చర్యలు కొనసాగుతున్నట్లు CMPFO సమాధానం స్పష్టం చేసింది.