భూపాలపల్లిలో ఘనంగా ఫ్యామిలీ డే బతుకమ్మ వేడుకలు.
సింగరేణి మహిళల ఆటపాటలతో సందడి. విజేతలకు బహుమతుల ప్రదానం.
(ప్రజాలక్ష్యం ప్రతినిధి)
జయశంకర్-భూపాలపల్లి, అక్టోబర్ 16: సింగరేణి భూపాలపల్లి ఏరియా ఆధ్వర్యంలో కృష్ణ కాలనీలోని సింగరేణి మినీ ఫంక్షన్ హాల్‌లో శుక్రవారం ఫ్యామిలీ డే బతుకమ్మ వేడుకలను ఘనంగా నిర్వహించారు. ఈ కార్యక్రమానికి భూపాలపల్లి ఏరియా జనరల్ మేనేజర్ ఏనుగు రాజేశ్వర్ రెడ్డి, సేవాధ్యక్షురాలు సునీత రాజేశ్వర్ రెడ్డి ముఖ్య అతిథులుగా హాజరై వేడుకలను ప్రారంభించారు. ఈ సందర్భంగా మహిళలకు వివిధ ఆటల పోటీలు, సాంస్కృతిక కార్యక్రమాలు నిర్వహించారు. రంగురంగుల పూలతో అందంగా అలంకరించిన బతుకమ్మలతో మహిళలు ఆటపాటలతో సందడి చేశారు. తెలంగాణ సంస్కృతి, సంప్రదాయాలను ప్రతిబింబించేలా వేడుకలు ఉత్సాహభరిత వాతావరణంలో కొనసాగాయి. మహిళలు పెద్ద సంఖ్యలో పాల్గొని బతుకమ్మ పాటలు పాడుతూ పండుగ ఉత్సాహాన్ని చాటుకున్నారు. వివిధ పోటీల్లో విజేతలుగా నిలిచిన మహిళలకు ముఖ్య అతిథుల చేతుల మీదుగా బహుమతులు అందజేశారు. ఫ్యామిలీ డే బతుకమ్మ వేడుకలు సింగరేణి కుటుంబ సభ్యుల మధ్య ఐక్యత, స్నేహభావాన్ని పెంపొందించడంతో పాటు మహిళల్లో ఉత్సాహాన్ని నింపాయి. సంప్రదాయ పండుగను కుటుంబ సభ్యులందరితో కలిసి జరుపుకోవడం ఆనందాన్ని కలిగించిందని నిర్వాహకులు తెలిపారు. ఈ కార్యక్రమంలో జీఎంకు ఓఎస్డీగా వ్యవహరించే ఎస్‌వో టు జీఎం రామన్ వి. పాఠక్, ఏజీఎం (ఐఈడీ) జ్యోతి, ఏజీఎం (ఈ అండ్ ఎం) సాంబశివరావు, ఓసీ-3 పీవో రామస్వామి, డీజీఎం (ఫైనాన్స్) రాజేశ్వర్, పర్సనల్ మేనేజర్ ఎస్. శ్యామ్ సుందర్, ఏఐటీయూసీ నాయకుడు మోటపలుకుల రమేశ్, భూపాలపల్లి సీఎంఓఏఐ అధ్యక్షుడు నజీర్ తదితరులు పాల్గొన్నారు.
