కుల వివక్షకు స్వస్తి పలకాలి.. సామాజిక సమానత్వం సాధించాలి: గడిపే చక్రపాణి.
ఎస్సీ, ఎస్టీలను చిన్నచూపు చూడొద్దు.. రిజర్వేషన్లపై మాట్లాడే ముందు వాస్తవాలు తెలుసుకోవాలి.
సింగరేణి ఎస్సీ, ఎస్టీ ఉద్యోగుల సంక్షేమ సంఘం ఆధ్వర్యంలో స్వాతంత్ర్య దినోత్సవ వేడుకలు.
(ప్రజాలక్ష్యం ప్రతినిధి)
జయశంకర్-భూపాలపల్లి, ఆగస్టు 15: దేశానికి స్వాతంత్ర్యం వచ్చి 80 ఏళ్లు పూర్తయినా కుల వివక్ష కొనసాగడం బాధాకరమని, కుల వివక్షకు స్వస్తి పలికి సామాజిక సమానత్వం సాధించేందుకు ప్రతి ఒక్కరూ కృషి చేయాలని సింగరేణి ఎస్సీ, ఎస్టీ ఉద్యోగుల సంక్షేమ సంఘం నాయకుడు గడిపే చక్రపాణి అన్నారు. దళితులు, గిరిజనులను చిన్నచూపు చూడకుండా వారి హక్కులు, ఆత్మగౌరవాన్ని గౌరవించాలని పిలుపునిచ్చారు. జయశంకర్-భూపాలపల్లి జిల్లా కేంద్రంలోని సింగరేణి ఎస్సీ, ఎస్టీ ఉద్యోగుల సంక్షేమ సంఘం కార్యాలయ ఆవరణలో శనివారం 80వ స్వాతంత్ర్య దినోత్సవ వేడుకలు ఘనంగా నిర్వహించారు. ఈ వేడుకలకు హాజరైన గడిపే చక్రపాణి మాట్లాడుతూ, ముందుగా సంఘం వ్యవస్థాపక ఉపాధ్యక్షుడు ఎం.వి. రావు, బ్రాంచ్ కార్యదర్శి మండల శ్రీనివాస్ లతో పాటు వేడుకలకు హాజరైన వారందరికీ స్వాతంత్ర్య దినోత్సవ శుభాకాంక్షలు తెలిపారు.
కుల వివక్షకు స్వస్తి పలకాలి:
దేశంలో కుల వివక్షకు తావులేకుండా ప్రతి ఒక్కరూ సమానత్వ భావనతో జీవించాలని చక్రపాణి అన్నారు. ఇటీవల ఉత్తరప్రదేశ్లో కాంగ్రెస్ నాయకుడు మల్లికార్జున ఖర్గే కార్యక్రమం అనంతరం ఆయన పాల్గొన్న వేదికను కొందరు శుద్ధి చేశారన్న వార్తలను ప్రస్తావిస్తూ, ఇలాంటి ఘటనలు సమాజంలో కుల వివక్షను మరింత పెంచుతాయని అన్నారు. మతం పేరుతో దళితులు, గిరిజనుల పట్ల వివక్ష చూపడం సరికాదన్నారు. రామాయణంలో సీతాదేవి అడవుల్లో ఉన్న సమయంలో గిరిజనులు ఆమెకు, ఆమె పిల్లలకు అండగా నిలిచిన విషయాలను గుర్తు చేస్తూ, మన పురాణాలు, చరిత్రలోనే వివిధ సామాజిక వర్గాల మధ్య ఉన్న అనుబంధానికి ఎన్నో ఉదాహరణలు ఉన్నాయని అన్నారు. జాంబవంతుడు, శ్రీకృష్ణుడి కథను ప్రస్తావిస్తూ సామాజిక వర్గాల మధ్య బంధుత్వం, అనుబంధాలు చరిత్రలో ఉన్నాయని తెలిపారు. అందువల్ల కులాల పేరుతో వివక్ష చూపడం మానుకోవాలని కోరారు.
రిజర్వేషన్లపై వాస్తవాలు తెలుసుకోవాలి:
నీట్ వంటి పోటీ పరీక్షల్లో రిజర్వేషన్ విధానం అమల్లో ఉన్న నేపథ్యంలో ఎస్సీ, ఎస్టీ, బీసీ వర్గాల విద్యార్థులకు లభిస్తున్న అవకాశాలను అర్థం చేసుకోవాలని చక్రపాణి అన్నారు. రిజర్వేషన్లు వద్దని మాట్లాడేవారు ముందుగా సామాజిక, ఆర్థిక అసమానతలను అర్థం చేసుకోవాలని సూచించారు. అదేవిధంగా ఆర్థికంగా వెనుకబడిన అగ్రవర్ణాల కోసం ఈడబ్ల్యూఎస్ రిజర్వేషన్ అమల్లో ఉందని గుర్తుచేశారు. కాపు, కమ్మ, రెడ్డి తదితర వర్గాలకు చెందిన ఆర్థికంగా వెనుకబడిన వారికి కూడా ఈడబ్ల్యూఎస్ ద్వారా అవకాశాలు లభిస్తున్నాయని అన్నారు. ఒకవైపు రిజర్వేషన్లను వ్యతిరేకిస్తూ, మరోవైపు తమకు అందుబాటులో ఉన్న రిజర్వేషన్ ప్రయోజనాలను పొందడం సరికాదన్నారు.
విదేశాల్లో కులం అడగరు.. ఇక్కడే ఎందుకు?
విద్య, ఉద్యోగాల కోసం అమెరికా, కెనడా తదితర దేశాలకు వెళ్తున్న భారతీయులను అక్కడి ప్రభుత్వాలు కులం ఆధారంగా గుర్తించవని చక్రపాణి అన్నారు. భారతదేశంలో మాత్రం ఎస్సీ, ఎస్టీ, బీసీ తదితర కులాల వివరాలకు ప్రత్యేక కాలమ్ ఉండటం సామాజిక వ్యవస్థలో కులం ఎంతగా పాతుకుపోయిందో చూపుతుందన్నారు. నిజంగా కుల వివక్షను తొలగించాలని కోరుకుంటే కుల ఆధారిత వివక్షకు స్వస్తి పలకడానికి అందరూ చిత్తశుద్ధితో ముందుకు రావాలని అన్నారు. దళిత, గిరిజన వర్గాలకు గొప్ప చరిత్ర ఉందని, సామాజికంగా వెనుకబడి ఉన్నప్పటికీ నేడు విద్య, ఉద్యోగ రంగాల్లో ఎంతో పురోగతి సాధిస్తున్నారని తెలిపారు. డాక్టర్ బి.ఆర్. అంబేద్కర్ అందించిన రాజ్యాంగ హక్కులు, రిజర్వేషన్ల ఫలితంగా ఎస్సీ, ఎస్టీ వర్గాలకు చెందిన అనేక మంది ఉన్నత స్థానాలకు ఎదుగుతున్నారని అన్నారు. భవిష్యత్తులో దళిత, గిరిజన వర్గాలు పాలనా రంగంలో మరింత ఉన్నత స్థానాలకు చేరుకునే అవకాశం ఉందని పేర్కొన్నారు.
‘మేము మీకు శత్రువులం కాదు’:
దళితులు, గిరిజనులు ఎవరికీ శత్రువులు కాదని, తాము కూడా భారతదేశంలో సమాన భాగస్వాములమేనని చక్రపాణి అన్నారు. జై శ్రీరామ్ అని చెప్పుకునే వారితో తమకు ఎలాంటి విభేదాలు లేవని, అయితే ఆ పేరుతో కుల వివక్షకు పాల్పడటం మాత్రం సరికాదన్నారు. మత విశ్వాసాలను గౌరవిస్తూనే ప్రతి మనిషిని సమానంగా గౌరవించే సమాజాన్ని నిర్మించాల్సిన అవసరం ఉందన్నారు. సమాజంలో ఒక వర్గాన్ని ఎంతగా అణచివేస్తే అంతే స్థాయిలో ప్రతిస్పందన వచ్చే అవకాశం ఉంటుందని, అందువల్ల వివక్షకు దూరంగా ఉండాలని హెచ్చరించారు. భవిష్యత్ తరాలకు సమానత్వం, సోదరభావం, సామాజిక న్యాయం అందించే బాధ్యత ప్రతి ఒక్కరిపై ఉందన్నారు.
ఈ కార్యక్రమంలో సంఘం వ్యవస్థాపక అధ్యక్షుడు ఎం.వి. రావు, బ్రాంచ్ కార్యదర్శి మండల శ్రీనివాస్, టెలికాం సిగ్నలింగ్ లైన్ ప్రెసిడెంట్ శ్రీనివాస్, గేటింగ్ వన్ లైన్ అసిస్టెంట్ ప్రెసిడెంట్, సెక్రటరీ గురువరాజు, ఎస్సీ నాయకుడు కుమారస్వామి, పిట్ సెక్రటరీలు కుమ్మరి శ్రీనివాస్, అసిస్టెంట్ పిట్ సెక్రటరీ దుర్గరాజ్, ఐఎన్టీయూసీ అనుబంధ కాంట్రాక్ట్ కార్మికుల సంఘం వైస్ ప్రెసిడెంట్ నాగేంద్రబాబు (చంటి), సంఘం సభ్యులు, కార్మికులు తదితరులు పాల్గొన్నారు.
