సింగరేణిలో భారీ స్థాయిలో అధికారుల బదిలీలు.
మైనింగ్, ఈఅండ్ఎం, పర్సనల్, మెడికల్ విభాగాల్లో విస్తృత మార్పులు.
200 మందికి పైగా అధికారులకు కొత్త పోస్టింగ్లు.. జూన్ 8లోగా విధుల్లో చేరాలని ఆదేశాలు.
(ప్రజాలక్ష్యం ప్రతినిధి)
కొత్తగూడెం, మే 31:సింగరేణి కాలరీస్ కంపెనీ లిమిటెడ్ (ఎస్సీసీఎల్)లో భారీ స్థాయిలో అధికారుల బదిలీలు చేపట్టారు. సంస్థలోని మైనింగ్, ఎలక్ట్రికల్ అండ్ మెకానికల్ (ఈఅండ్ఎం), పర్సనల్, మెడికల్ విభాగాలకు చెందిన వందలాది మంది అధికారులకు కొత్త పోస్టింగ్లు కల్పిస్తూ సింగరేణి యాజమాన్యం ఆదివారం ఉత్తర్వులు జారీ చేసింది. పరిపాలనా అవసరాలు, మానవ వనరుల సమర్థ వినియోగం, ఉత్పత్తి లక్ష్యాల సాధన దృష్ట్యా ఈ బదిలీలు చేపట్టినట్లు తెలుస్తోంది. సింగరేణి చరిత్రలోనే ఇటీవలి కాలంలో జరిగిన అతిపెద్ద అధికారుల బదిలీల్లో ఇది ఒకటిగా భావిస్తున్నారు. మైనింగ్ విభాగంలో జనరల్ మేనేజర్లు, అదనపు జనరల్ మేనేజర్లు, డిప్యూటీ జనరల్ మేనేజర్లు, మేనేజర్లు, డిప్యూటీ మేనేజర్లు, ఇంజనీర్లు, మేనేజ్మెంట్ ట్రైనీల వరకు 113 మందికి పైగా అధికారులను వివిధ ఏరియాలు, గనులు, ప్రాజెక్టులకు బదిలీ చేశారు. ఈఅండ్ఎం విభాగంలో 68 మంది అధికారులకు బదిలీలు: ఎలక్ట్రికల్ అండ్ మెకానికల్ (ఈఅండ్ఎం) విభాగానికి చెందిన 68 మంది ఎగ్జిక్యూటివ్ అధికారులను బదిలీ చేస్తూ పర్సనల్ విభాగం జనరల్ మేనేజర్ ప్రత్యేక ఉత్తర్వులు జారీ చేశారు. వీరిలో డిప్యూటీ జనరల్ మేనేజర్లు (డీజీఎంలు), సూపరింటెండింగ్ ఇంజనీర్లు (ఎస్ఈలు), డిప్యూటీ ఎస్ఈలు, ఎగ్జిక్యూటివ్ ఇంజనీర్లు, అసిస్టెంట్ ఇంజనీర్లు, జూనియర్ ఇంజనీర్లు ఉన్నారు. డీజీఎంల స్థాయిలో గోవర్ధన వెంకట రాజాజీని ఆర్జీఓసీ-3 నుంచి ఆర్జీ-1 ఏరియా ఇంజనీర్గా, లక్ష్మణమూర్తి ఐవీఎస్బీని కొత్తగూడెం ఏరియా స్టోర్స్ నుంచి ఇల్లందు ఏరియా ఇంజనీర్గా, ఎస్.జె. శ్రీనివాసరాజును హైదరాబాద్ నుంచి భూపాలపల్లి ఏరియా ఇంజనీర్గా బదిలీ చేశారు.సూపరింటెండింగ్ ఇంజనీర్ స్థాయిలో గోలి సదానందంను ఆర్జీ-2 నుంచి హైదరాబాద్ మార్కెటింగ్ విభాగానికి, పి. శైలేంద్ర కుమార్, దాసరి శ్రీనివాస్లను ఆర్జీ-1 ప్రాంతానికి బదిలీ చేశారు.
పర్సనల్ విభాగంలో కీలక మార్పులు:
పర్సనల్ విభాగంలో 30 మంది అధికారులకు కొత్త పోస్టింగ్లు కల్పించారు. ఆర్జీ-2 ఏరియాలో పనిచేస్తున్న ఏజీఎం (పర్సనల్) పి. అరవింద్రావును హైదరాబాద్ లా విభాగానికి బదిలీ చేయగా, వైవీఎల్ వరప్రసాద్ను కార్పొరేట్ మెయిన్ హాస్పిటల్కు, బి. శివకేశవరావును వెల్ఫేర్ విభాగానికి బదిలీ చేశారు. వివిధ ఏరియాల్లోని డిప్యూటీ పర్సనల్ మేనేజర్లు, సీనియర్ పర్సనల్ అధికారులకు కూడా స్థానచలనం కల్పించారు.
మెడికల్ విభాగంలోనూ మార్పులు:
మెడికల్ విభాగంలో పలువురు వైద్యాధికారులకు బదిలీలు జరిగాయి. డాక్టర్ జున్నోజు జ్యోత్స్నాదేవిని రామకృష్ణాపూర్ ఏరియా ఆసుపత్రి నుంచి ఆర్జీ-1 ఏరియా ఆసుపత్రికి, డాక్టర్ ఎల్తూరి రాజును కొత్తగూడెం మెయిన్ హాస్పిటల్ నుంచి ఆర్జీ-1 ఏరియా ఆసుపత్రికి, డాక్టర్ ఉండింటి సుహాసినిని ఆర్జీ-1 నుంచి రామకృష్ణాపూర్ ఏరియా ఆసుపత్రికి బదిలీ చేశారు. మరికొందరు వైద్యాధికారులకు కూడా కొత్త బాధ్యతలు అప్పగించారు.
పాత బదిలీ ఉత్తర్వుల రద్దు:
ఈఅండ్ఎం విభాగానికి సంబంధించి గత ఏడాది నవంబర్లో జారీ చేసిన కొంతమంది అధికారుల బదిలీ ఉత్తర్వులను యాజమాన్యం రద్దు చేసింది. ముఖ్యంగా డిప్యూటీ ఎస్ఈలు కన్నూరి శ్రీనివాసరావు, మునగాల సమంత్రెడ్డిల బదిలీలను రద్దు చేస్తూ తాజా ఉత్తర్వుల్లో పేర్కొన్నారు.
స్వచ్ఛంద బదిలీలకు ప్రాధాన్యం:
మైనింగ్, ఈఅండ్ఎం, పర్సనల్ విభాగాల్లో జరిగిన బదిలీల్లో గణనీయ సంఖ్యలో అధికారులు స్వచ్ఛంద అభ్యర్థనల మేరకు స్థానచలనం పొందినట్లు తెలుస్తోంది. ఈఅండ్ఎం విభాగంలోనే సుమారు 28 మంది అధికారులు తమ అభ్యర్థనల ఆధారంగా బదిలీలు పొందినట్లు సమాచారం.
జూన్ 8లోగా విధుల్లో చేరాలి:
బదిలీ అయిన అధికారులు జూన్ 8, 2026లోగా తమ ప్రస్తుత స్థానాల నుంచి రిలీవ్ అయి కొత్తగా కేటాయించిన ప్రాంతాల్లో విధుల్లో చేరాలని సింగరేణి యాజమాన్యం ఆదేశించింది. సంబంధిత ప్రాంతాల జనరల్ మేనేజర్లకు రిపోర్ట్ చేయాలని స్పష్టం చేసింది.
జీతభత్యాల్లో మార్పు లేదు:
ఈ బదిలీల కారణంగా ఏ అధికారికీ హోదాలో గానీ, వేతన శ్రేణిలో గానీ ఎలాంటి మార్పులు ఉండవని యాజమాన్యం స్పష్టం చేసింది. సంస్థ ప్రయోజనాలు, పరిపాలనా సామర్థ్యాల పెంపు, ఉత్పత్తి లక్ష్యాల సాధన దృష్ట్యా ఈ భారీ బదిలీల ప్రక్రియ చేపట్టినట్లు సింగరేణి వర్గాలు పేర్కొన్నాయి. సింగరేణిలో ఒకేసారి ఇంత పెద్ద సంఖ్యలో అధికారులకు బదిలీలు జరగడం ఉద్యోగ వర్గాల్లో చర్చనీయాంశంగా మారింది. కొత్త బాధ్యతలతో అధికారులు తమ తమ ప్రాంతాల్లో విధుల్లో చేరేందుకు సన్నాహాలు ప్రారంభించారు.
