రామగిరి ఖిల్లాను కాలినడకన అధిరోహించిన ఎంపీ వంశీకృష్ణ.. యువతకు ట్రెక్కింగ్ సవాల్!
ట్రెక్కింగ్‌లో విజేతకు వన్‌ప్లస్ ఫోన్ బహుమతి.
10 కిలోమీటర్ల సాహసయాత్ర.. ఏడు గేట్లు, రెండు సరస్సులు, నాలుగు గుట్టలు దాటి ఆలయాల సందర్శన.
రామగిరి ఖిల్లాకు రోప్‌వే ఏర్పాటుతో పర్యాటక అభివృద్ధికి కృషి.
(ప్రజాలక్ష్యం ప్రతినిధి)
మంథని, అక్టోబర్ 26:తెలంగాణ చారిత్రక, సాంస్కృతిక వారసత్వానికి ప్రతీకగా నిలిచిన రామగిరి ఖిల్లాకు పర్యాటకంగా మరింత గుర్తింపు తీసుకువచ్చే లక్ష్యంతో పెద్దపల్లి ఎంపీ గడ్డం వంశీకృష్ణ ప్రత్యేక దృష్టి సారించారు. ఇందులో భాగంగా సోమవారం ఆయన సుమారు 10 కిలోమీటర్ల మేర కాలినడకన ట్రెక్కింగ్ చేస్తూ ఖిల్లాలోని చారిత్రక కట్టడాలు, పురాతన ఆలయాలు, ప్రకృతి అందాలను సందర్శించారు. ఏడు గేట్లు, రెండు సరస్సులు దాటి, నాలుగు గుట్టలను అధిరోహించి ఖిల్లా పైభాగానికి చేరుకున్నారు. అక్కడి శివాలయం, శ్రీరామచంద్రస్వామి ఆలయాల్లో ప్రత్యేక పూజలు నిర్వహించారు.
యువతకు ట్రెక్కింగ్ సవాల్.. విజేతకు వన్‌ప్లస్ ఫోన్:
రామగిరి ఖిల్లాలో తాను చేపట్టిన ట్రెక్కింగ్ ద్వారా యువతలో సాహస క్రీడలు, శారీరక దృఢత్వంపై ఆసక్తిని పెంపొందించాలనే ఉద్దేశంతో ఎంపీ వంశీకృష్ణ యువతకు ట్రెక్కింగ్ సవాల్ విసిరారు. ఈ సవాల్‌లో విజేతగా నిలిచిన వారికి వన్‌ప్లస్ ఫోన్‌ను బహుమతిగా అందించనున్నట్లు ప్రకటించారు. యువత చారిత్రక ప్రదేశాలను సందర్శించడంతో పాటు ఆరోగ్యం, ఫిట్‌నెస్‌పై దృష్టి సారించేలా ప్రోత్సహించడమే ఈ కార్యక్రమం ఉద్దేశంగా పేర్కొన్నారు.
రోప్‌వేతో పర్యాటక అభివృద్ధికి ప్రణాళిక:
రామగిరి ఖిల్లాకు రోప్‌వే ఏర్పాటు చేయడానికి కేంద్ర స్థాయిలో ఎంపీ వంశీకృష్ణ చొరవ తీసుకుని నిధుల మంజూరుకు కృషి చేశారు. రోప్‌వే అందుబాటులోకి వస్తే ఖిల్లాను సందర్శించే పర్యాటకులకు ప్రయాణం సులభతరం కానుంది. ముఖ్యంగా వృద్ధులు, మహిళలు, పిల్లలు సైతం చారిత్రక ప్రదేశాన్ని సౌకర్యవంతంగా సందర్శించే అవకాశం కలుగుతుంది. పర్యాటకుల సంఖ్య పెరిగితే మంథని ప్రాంతానికి మరింత గుర్తింపు లభించడంతో పాటు స్థానికంగా ఉపాధి అవకాశాలు మెరుగుపడే అవకాశం ఉంది. రామగిరి ఖిల్లాలోని పురాతన ఆలయాలు, కోట నిర్మాణాలు, ప్రకృతి అందాలను విస్తృతంగా ప్రచారం చేయడం ద్వారా ఈ ప్రాంతాన్ని ప్రముఖ పర్యాటక కేంద్రంగా తీర్చిదిద్దవచ్చనే లక్ష్యంతో అభివృద్ధి ప్రయత్నాలు కొనసాగుతున్నాయి. ఎంపీ వంశీకృష్ణ చేపట్టిన ట్రెక్కింగ్, యువతకు ఇచ్చిన సవాల్ ఈ చారిత్రక ప్రాంతంపై మరింత ఆసక్తిని పెంచే ప్రయత్నంగా నిలిచాయి. రోప్‌వే ఏర్పాటుతో పాటు పర్యాటక మౌలిక సదుపాయాలు మెరుగుపడితే రామగిరి ఖిల్లాకు మరింత గుర్తింపు లభించనుంది.
