వాతావరణ విధానాల్లో కార్మికుల ప్రయోజనాలకే ప్రాధాన్యం : ఐఎన్‌టీయూసీ జాతీయ కార్యదర్శి డా. జనక్ ప్రసాద్.
వాతావరణ విధానాల్లో కార్మికుల ప్రయోజనాలకే ప్రాధాన్యం.
ఉపాధి, వేతనాలు, ఉద్యోగ భద్రత, సామాజిక రక్షణకు పటిష్ట చర్యలు తీసుకోవాలి.
ఐఎన్‌టీయూసీ జాతీయ కార్యదర్శి డా. జనక్ ప్రసాద్.
(ప్రజాలక్ష్యం ప్రత్యేక ప్రతినిధి)
హైదరాబాద్, అక్టోబర్ 25: వాతావరణ మార్పుల నేపథ్యంలో రూపొందించే విధానాల్లో కార్మికుల ఉపాధి, జీవనోపాధి, వేతనాలు, ఉద్యోగ భద్రత, సామాజిక రక్షణకు అత్యంత ప్రాధాన్యత కల్పించాలని ఐఎన్‌టీయూసీ జాతీయ కార్యదర్శి డా. జనక్ ప్రసాద్ పిలుపునిచ్చారు. పర్యావరణ పరిరక్షణతో పాటు కార్మికుల హక్కులను కాపాడుతూ, ఇంధన రంగంలో మార్పులు కార్మికుల జీవితాలపై ప్రతికూల ప్రభావం చూపకుండా సమగ్ర ప్రణాళికలు రూపొందించాలని సూచించారు. హైదరాబాద్‌లో భారత జాతీయ కార్మిక సంఘ కాంగ్రెస్ (ఐఎన్‌టీయూసీ), జర్మనీకి చెందిన ఒక రాజకీయ సంస్థ సంయుక్తంగా ఆదివారం నిర్వహించిన ‘భారతదేశం కోసం కార్మిక సంఘాల నేతృత్వంలో జాతీయ వాతావరణ మార్పుల విధాన రూపకల్పన’ అంశంపై జాతీయ స్థాయి సంప్రదింపుల సమావేశంలో డా. జనక్ ప్రసాద్ పాల్గొని ప్రసంగించారు. ఈ సందర్భంగా ఆయన మాట్లాడుతూ, వాతావరణ మార్పులు ప్రపంచవ్యాప్తంగా తీవ్ర ప్రభావం చూపుతున్నాయని, వాటిని ఎదుర్కొనే క్రమంలో పర్యావరణ పరిరక్షణతో పాటు కార్మికుల ప్రయోజనాలను కూడా సమానంగా పరిగణనలోకి తీసుకోవాల్సిన అవసరం ఉందన్నారు. సంప్రదాయ ఇంధన వనరుల నుంచి స్వచ్ఛమైన, పర్యావరణహిత ఇంధన వనరుల వైపు మారడం అవసరమే అయినప్పటికీ, ఈ పరివర్తన కారణంగా కార్మికులు ఉపాధి కోల్పోకుండా ప్రభుత్వాలు ముందస్తు చర్యలు చేపట్టాలని స్పష్టం చేశారు. ముఖ్యంగా బొగ్గు పరిశ్రమలో పనిచేస్తున్న కార్మికులు, సింగరేణి బొగ్గు గనుల కార్మికుల సమస్యలను ప్రస్తావిస్తూ, దేశ పారిశ్రామిక అభివృద్ధి, ఇంధన భద్రతలో బొగ్గు కార్మికుల పాత్ర కీలకమని పేర్కొన్నారు. ఇంధన విధానాల్లో మార్పులు, పరిశ్రమల పునర్వ్యవస్థీకరణ వల్ల వారి జీవనోపాధికి ముప్పు కలగకుండా స్పష్టమైన కార్యాచరణతో కూడిన సమగ్ర విధానాలు రూపొందించాలని కోరారు. ఇంధన రంగంలో మార్పులతో ప్రభావితమయ్యే కార్మికులకు ప్రత్యామ్నాయ ఉపాధి అవకాశాలు కల్పించడం, నైపుణ్యాభివృద్ధి శిక్షణ ఇవ్వడం, పునఃశిక్షణకు అవకాశాలు కల్పించడం, సామాజిక భద్రతను బలోపేతం చేయడం, న్యాయమైన పరిహారం అందించడం ప్రభుత్వ విధానాల్లో అంతర్భాగం కావాలని సూచించారు. మారుతున్న పారిశ్రామిక పరిస్థితులకు అనుగుణంగా స్థిరమైన ఉపాధి అవకాశాలను సృష్టించి, కార్మికులు ఆర్థికంగా నష్టపోకుండా చర్యలు తీసుకోవాలని అన్నారు. వాతావరణ మార్పులపై విధానాల రూపకల్పనలో కార్మిక సంఘాలకు క్రియాశీలక పాత్ర కల్పించాలని డా. జనక్ ప్రసాద్ కోరారు. కార్మికుల అభిప్రాయాలు, సమస్యలు, అవసరాలకు నిర్ణయాత్మక ప్రక్రియలో తగిన ప్రాధాన్యత ఇవ్వాలన్నారు. పర్యావరణ పరిరక్షణ, కార్మిక హక్కులు, ఉపాధి భద్రత మధ్య సమతుల్యత సాధించినప్పుడే న్యాయబద్ధమైన, సమ్మిళితమైన ఇంధన పరివర్తన సాధ్యమవుతుందని పేర్కొన్నారు. ఈ జాతీయ స్థాయి సంప్రదింపుల సమావేశంలో వాతావరణ మార్పులపై కార్మిక సంఘాల ఉమ్మడి విధానాన్ని రూపొందించడం, సామాజిక సంభాషణను బలోపేతం చేయడం, పర్యావరణహిత ఆర్థిక వ్యవస్థ దిశగా భారతదేశం సాగించే ప్రయాణంలో కార్మికులకు న్యాయం జరిగేలా తీసుకోవాల్సిన చర్యలపై నాయకులు, ప్రతినిధులు తమ అభిప్రాయాలను పంచుకున్నారు. ఈ సమావేశంలో ఐఎన్‌టీయూసీ ప్రధాన కార్యదర్శి ఆర్.డి. చంద్రశేఖర్, ఎఫ్‌ఈఎస్‌కు చెందిన అనూప్ శ్రీవాస్తవ, ఏఐటీయూసీకి చెందిన నరసింహ, ఏఐటీయూసీ–ఎస్‌సీసీఎల్‌కు చెందిన సీతారామయ్య, ఐఎన్‌టీయూసీ కర్ణాటకకు చెందిన లక్ష్మీ వెంకటేష్, ఐఎన్‌టీయూసీ ఉపాధ్యక్షుడు విజయ్ కుమార్ యాదవ్, ఐఎన్‌టీయూసీ (ఎస్‌సీసీఎల్) ప్రధాన కార్యదర్శి వికాస్ కుమార్ యాదవ్, సీనియర్ వ్యూహాత్మక సలహాదారు దొంతి నరసింహారెడ్డి, కోల్యా మజ్దూర్ సభ డిప్యూటీ ప్రధాన కార్యదర్శి అక్తర్ జావేద్, ఐఎన్‌టీయూసీకి చెందిన షహనాజ్ రఫీక్, ఐఎన్‌టీయూసీ మహిళా విభాగం అధ్యక్షురాలు దేవికా సింగ్, ఐఎన్‌టీయూసీ యువజన విభాగం అధ్యక్షుడు శ్రీనివాసన్ తదితర కార్మిక సంఘాల నాయకులు, ప్రతినిధులు పాల్గొన్నారు.
